(வளர், தேய்) பிறைகள்..

அசந்தால் தசையினைத் துளைக்கும்
சுறாக்களினின்றும் தப்பிப்
பாறை கிடுக்குகளில் இருந்து
சிப்பிகளைப் பொறுக்கியெடுத்து,
கவர்பவர்களைத் துரத்த எத்தனிக்கும்
நீரின் செய்கையால் தள்ளிச்சென்ற
கயிற்றைத் தேடிப் பிடித்து,
அமுங்கிய பந்தாய் வந்தது
மனிதத் தவளை..

நீர்மட்டத்தினின்று மேலெழும்பி
முகிலைத் தொட்ட கழுகொன்று,
பதுங்கியோடும் வெள்ளெலி
உயிர்ப்பை உணர்த்த,
அலைந்து திரியும் காற்றை
இரை நோக்கிய பாதையாய் மாற்றி,
எதிர்ப்படும் துகள்களைத் தெறித்து,
வலுவிழந்து இறங்கியது முள்வேலியில்..